正所謂置諸死地而後生,一度陷於頹勢甘美奧,自從上輪自由盃擊敗博亞卡捷高後,打出一個三連勝,成個勢返晒,相信聽朝自由盃作客同組實力最弱奧羅拉,可以食住道勢再下一城,客勝值捧!(有線61周四早上8:50直播) 上季巴甲亞軍甘美奧,由於早前南美自由盃首場分組賽被智利大學逼和,加上之後州聯連續兩場未能取勝,練路夫被球迷高呼下台,球會亦表明第二輪作客贏唔到博亞卡捷高的話,就會即炒路夫。 其實場波對甘美奧講可謂非常難踢,事關博亞卡捷高主場位於海拔二千七百八十二米,而且仲要搭成一百四十公里車先去到,不過甘美奧最後成功反底贏一比○,之後州聯更食住道勢,先贏沙佩卡尼斯二比○,再主場大炒阿雷格勒聖荷西六個一皮,依家士氣可謂爆晒燈。 相反對家奧羅拉雖然依家玻利維亞聯賽做緊二哥,不過出到去自由盃呢大場面立即變魚腩,頭兩場分組賽都輸○比三,睇怕今場對住同組實力最強 甘美奧,都難逃一劫咯! |