季五遇天水圍飛馬均未嘗一勝的本地班霸南華，今晚在旺角場的本地甲足獨腳戲中再遇宿敵，為求復仇成功，一於「兄弟」都冇面畀，賽前南華足主羅傑承更下達「必殺令」，揚言今仗未能贏波的話即會全體受處分，誓要不勝無歸。
有大半隊職球員出自南華的飛馬，今季每次倒戈均大打爭氣波，除了季前兩次熱身賽取得一勝一和外，就連在銀牌及聯賽盃亦先後淘汰南華。即使在首循環聯賽交手，飛馬亦能以三比二險勝，惟因飛馬在該役錯派超額外援上陣，事後足總改判南華勝三比○，少林寺才能保住聯賽「不敗身」，但亦相當失威。
贏唔到即全體受罰
為報今季四敗之辱，兼夾全速向聯賽冠軍進發，南華足主羅傑承強調，今仗許勝不許敗：「南華只要在聯賽再贏五場，便可提前捧盃，對手飛馬有主力伊達停賽，南華則『夫添』出擊，我唔會再講贏飛馬幾多球，我只要求贏波，否則全部球員都要受罰。」事實上，南華近期狀態的確處於高峰，早前在亞協盃兩連勝後，更獲亞洲足協官網表揚。
飛馬目標聯賽三甲
至於飛馬其實亦未輸蝕，自月初在聯賽盃淘汰南華出局後，繼而再贏東方殺入決賽，有望成為銀牌與聯賽盃雙冠王，近況亦是相當理想。對於再戰南華，飛馬會長王威信表明，球隊會全力爭取三分，向聯賽三甲目標進發。兩軍實力、氣勢旗鼓相當，肯定惡戰難免。 |
足球网址大全