今晚英甲獨腳戲修安聯對哈特普爾。睇番積分榜形勢,修安聯與升班附加賽距離六分,計數仲有得追,決心絕對有,雖然哈特普爾護級大業未成,但球隊近況正值低沉,修安聯主W有1.75倍捧得過。(周六凌晨3時45分開賽)
首循環慘吞3蛋
修安聯去年十二月作客○比三輸畀哈特普爾,陣中中場麥哥馬克話對唔住班球迷,今晚返主場一定報仇咁話:「當日所發生一切,令修安聯球員及球迷感到失望,尤其係有唔少忠實球迷老遠去支持球隊,我覺得欠佢一個人情,今晚一定搏盡,務求贏番哈特普爾,唔想球迷要再次傷感地離場。」修安聯講得出,絕對有力做得到,皆因球隊主場已經兩連勝,加上近兩次主場對哈特普爾都贏波,信心更強。
哈特普爾三月初砌低強敵燦美爾後,成績急轉直下,聯賽四連敗,上周主場對米禾爾輸得最肉酸,半場領先兩粒,最後反輸二比三,對球隊士氣好有影響,今晚作客修安聯非常惡踢。