世界盃外圍賽,中北美洲區焦點場次一定係墨西哥主場對哥斯達黎加。墨西哥瑞典籍領隊艾歷臣賽前講到明今場非勝不可,稍有差池唔單止連累墨西哥冇得出線,自己都可能要提早執包袱。墨西哥今場有極大爭勝決心支持,主W有望順利開出。(周日早上7時開賽)
哥斯達黎加往績蝕底
中北美洲區已經進入到第四圈賽事,而首輪賽事墨西哥認真失威,以○比二輸畀宿敵美國。為保直接躋身世界盃決賽周資格,墨西哥絕不能再失分。其實艾歷臣將會被炒消息早於去年已經傳出,不過墨西哥唔想太快作出人事變動,故留待賽前才向艾歷臣發出最後通牒。睇番賽績,哥斯達黎加近三次作客墨西哥都係落敗而回,賽績上對墨西哥有明顯支持。
哥斯達黎加一路以來都未遇過太大考驗,而上一圈分組賽,哥斯達黎加的確創下六戰全勝紀錄,不過同組對手只不過係海地、蘇里南等魚腩,參考價值唔大。今次遇到中北美洲「Big3」之一墨西哥,哥斯達黎加就未必咁好彩。