今晚世界盃歐洲區外圍賽揀第7組同大家研究,黑柴首選係大熟大勇塞爾維亞,以佢超強防線面對青黃不接羅馬尼亞有力坐和望贏(有線體育台62周日凌晨2時45分直播),「讓球客勝」得1.67倍玩單頭冇肉食,可以串落同組有1.5倍法國客W,乘埋有兩倍半都算值博。
羅馬尼亞陷低潮
塞爾維亞世界排名雖然比羅馬尼亞稍低,但睇今次外圍賽表現同成績都遠勝羅馬尼亞,目前四戰得九分排榜首,佢三線實力平均,防線係最強項,曼聯尼曼查維迪固然係目前世界最佳中堅之一,力車路士伊雲洛域亦愈戰愈勇,而且能夠適應多個位置,今仗更有多蒙特崛起廿一歲小將蘇保迪首度披上國家隊戰衣,塞爾維亞防線變相買多份保險。佢中前場亦極具侵略性,熱拿亞保斯高贊高域、莫斯科中央陸軍卡拉錫邊路活動範圍大,桑坦德強力中鋒施積狀態大勇,哈化柏林彭迪歷質高但球會餓波已久,佢都好有條件今仗發圍。
羅馬尼亞目前正處於低潮,精神領袖捷禾因傷缺陣,全隊只有費倫天拿梅度一個稱得上係球星,佢落後塞爾維亞五分,為爭出線主場要焗攻,益晒有穩守突擊本錢客軍。
法國可破立陶宛
至於同組法國目前亦同羅馬尼亞一樣得四分,今晚面對有九分在手立陶宛,即使作客都非勝不可,法國杜明歷麾下的確令人失望,不過呢班波始終質素超群,列貝利、亨利同賓施馬進攻組合,唔係一般二線球隊可以抵擋,何況立陶宛今仗陣容不整,力森多利亞防線領袖史坦基域斯因傷缺陣,對球隊構成致命打擊,而力利禾奴國家隊首席射手丹尼利雲斯亦有傷在身,相信好難對法國構成威脅。