Jo Wai個性活潑,周時坐唔定,最鍾意就係去旅行!早前同幾個姊妹飛去南韓,發現當地整容公司成行成市,多到似超市一樣;見到韓妹五官咁精緻,有個Friend都躍躍欲試!但Jo Wai就冇興趣喇,一來覺得冇需要(我好滿意自己Outlook,嘻嘻),二來又覺得「一號眼」、「二號鼻」咁砌個樣出,其實好礙眼囉!
大家有睇韓劇,都應該發覺好多女明星都極似樣,Jo Wai唔係話佢個個都整過容,但事實上係唔少Super Star都承認「大執」過。其實爹媽咪生我出來,已經決定外貌如何,自己貿貿然改佢,好似唔係好尊重囉。另外,依家化妝品好犀利,只要學曉當中竅妙,憑自己雙手都可以畫得好靚。
另外唔好話Jo Wai老套,「相由心生」呢句說話真係好!如果個人心地唔好,遇到少少唔睇、唔順眼同事就嘴藐藐,甚至講兩句粗口,咁冇修養,就算你整到一頭金髮、對眼好似戴「大眼仔」一樣咁精靈都冇用啦!無論女生或者男生,最緊要都係善良同有內涵,心地好又有愛心,個樣自然就順眼啦。
戥芬蘭兩老辛苦
就好似威爾斯前鋒比拿美咁,佢唔單止唔算靚仔,講真仲有醜樣添,但佢落到場就付出百分之二百努力,追波防守毫不錫力,渾身都充滿球味。其實威爾斯大部分都係呢類球員,講名氣雖然唔夠,但就有打不死精神,江東父老面前踢得特別生猛。今晚世界盃外圍賽歐洲區第4組主場鬥芬蘭,依家客軍都仲係由希比亞同列馬倫兩個老將撐住,點夠威爾斯砌呀,主隊小讓平半抵買呀!(有線足球台61周六晚11時直播)
扑扑趣
威爾斯陣中真係冇乜星味,最有前途、款頭最四正,都算係加里夫巴利喇。呢位熱刺左閘攻強於守,仲識射罰球,絕對係球隊未來十年鐵打正選,今晚威爾斯食粥食飯,靠晒佢喇!
Jo Wai
新一代女神,跳跳紮冇時停,鍾意做運動keep住至弗體態。波唔會落場踢,但就鍾意睇,只要得閒就乜聯賽直播都唔會放過,有樣有身材仲識波,問你點頂