今周英超迷可以轉轉口味,欣賞多場國際賽賽事,其中最矚目我會選葡萄牙對瑞典,葡軍依家四戰僅得五分排第四,再有咩閃失真係隨時滑鐵盧,唔算太難打第1組中出局。我都希望葡萄牙可以爭氣,若果二○一○年南非世界盃見唔到C朗話,真係少好多話題嘛。
雖然我想葡萄牙出線,但主隊今晚的確唔易踢,事關對手瑞典形勢同樣危危乎,現時同葡萄牙一樣得五分排第五,兩軍都唔想再輸波啦,估計作客瑞典肯定一字記之曰「守」,所以對於態沉葡萄牙講,都幾惡搞。
葡萄牙最大問題就係冇好中鋒,如果球隊有個艾迪巴約或者貝碧托夫,相信早已成為歐洲一線強隊。
愛爾蘭搵保軍數
只可惜葡萄牙多年都係得紐奴高美斯、普斯迪加等二、三線中鋒飛,浪費晒C朗、沙保沙呢咁好翼鋒,而領隊奎雷斯今次點兵,亦只係召不來梅曉高艾美達入伍,此子踢法粗糙,把握力又唔強,相信葡萄牙再一次老鼠拉龜都唔出奇,和波各得一分機會大。
至於惡戰連場第8組,愛爾蘭將會出戰保加利亞,客隊有最重要靈魂人物貝碧托夫缺陣,戰鬥力已經銳減,相信愛爾蘭會把握呢個絕佳良機,主場擊敗對手。
Jamie Yeo
新加坡辣妹才女,身兼模特兒、電台DJ及STAR Sports周四晚8點足球節目《Football Crazy》主持人,體育、娛樂、音樂樣樣精,但最鍾意都係睇英超!