九八年世界盃外圍賽歐洲區賽事德國對北愛爾蘭,比亞荷夫以「屈機」頭槌連中三元助球隊勝出,冇秀麗腳法,冇超凡射術,靠個頭殺晒,吹咩!○二年世界盃決賽朗拿度威晒,但只記得比亞荷夫後備入替車身抽射,畫面至今仍歷歷在目。
作為比亞荷夫死忠fans,今日見其加入德國國家隊領導層,搵到份高薪厚職養老,已經深感安慰。近年德國鋒線明顯出現青黃不接情況,高路斯雖然產量頗高,但往往於大戰隱形,好似比亞荷夫呢類「關鍵先生」,確實可遇不可求!
列支敦士登主場都輸六球
今次高路斯仲要傷埋,好彩今日德國對手只屬列支敦士登,上次德國作客都淨勝六球,今次返到主場可再狂數對手,大細中位數調整至4.5球,照捧大!